بقلم هاشم العماري
الجمعة هذي و كيما كل جمعة، كلات بعضها بين سلفيين و كفار (اللي هوما العباد اللي ما عندهمش نفس الفكر متاع إخواننا السلفيين)، أيا عاد سيدي المرة هذي الضرب قوى عالعادة، بعد اللي جماعة دوروها تكسير وتلة و بيران، و بعد اللي فما جماعة صحابهم تشدو في جندوبة كملو دارو على المراكز و المناطق دڨدڨوهم... و الحكومة سيدي خويا عاملة مولى الدار موش هوني و الوزرة متاعها قاعدين يدورو عالولايات، موش بش يشوفو المشاكل، لا بش يحكيو على إنجازاتهم، إللي أنا واحد من الناس لتوّا ما شفت منهم شي، ما بون هذا موش موضوعنا...
نرجعو للسلفية، أيا عاد سيدي بن سيدك خربقوها و عملوا كيما حبو... و الحكومة لا حياة لمن تنادي... الحكومة اللي جات من رحم الثورة قالوشي هوما، تالمون من رحم الثورة، الشباب اللي حرق المراكز في جانفي 2011، كتوهم ب 20 ل 30 سنة حبس، أما السلفيين كي يحرقو ميسالش و كيما قال الخليفة السادس 'ماهمش جايين مالمريخ و يقعدو ولادنا' باهي يا سيدي ولادنا، أما كي ولدك يغلط و يعمل عملة في الدار ما تربيهش ياخي؟ إلى متى يا أخي بش نسكتو عليهم؟ ولا على خاطر بن علي عمل فيهم قبل, توا كل شيء مسموح بش يعملوه؟
إلى متى الضعف هذا؟ ماكم حكومة شرعية وريونا الشرعية و القانون إلي فوق الجميع، ولا القانون فوق اليساريين و العلمانيين و حثالة فرنسا كاهاو؟ أما هوما لا؟
يبدى إلي حرق مركز بش توصل إنت للكرسي يتعاقب و إلي حرق مركز خاطر صاحبو تشد ما يصيرلو شي؟
ماكم في الملاحة وريتونا ملاحتكم و دخلتو عالعباد في ديارها بش جبتو المذنبين و فتقتو العباد بالڨاز و الماتراك، شبيكم توا ما فماش ريحتكم؟
ما كفاكمش ستاندارد أند بورز نقضتلنا في ترتيبنا، و سفارات أمريكا و سويسرا توصي في رعاياها بش ما تجيناش... فاش مزلتو تستاناو بش تاخذو موقف؟؟؟
إلى متى يا أخي إلى متى؟؟؟؟؟
يا هشام واللهي مدامك إعلامي مل مفروض تكون أول من يعرف أنهم شدو الجماعة إلي تحكي عليهم البارح...أما إذا هذا مايكفيش بش سيادتك تفش غلك في السلفيين اعطينا باللهي حل يرضيك..تراه؟...نعملولهم مخيم إعتقال نازي من بعد نعديوهم عالمحرقة؟ نرميوهم في البحر؟ نرجعوهم للحبوسات؟ اعطينا خويا حل؟
RépondreSupprimerحكاية السلفيين انتوما إلي عملتوها بيديكم...قعدتو أكثر من عام ونتوما تنفخو فيها هاو شوية بالإشاعات...شوية بتنقيص و شوية زيادة في الأخبار...تقريباً ماثماش حادثة فيها سلفيين ماحكيتوش عليها...حتى لين ولا إنطباع عند الرأي العام انو السلفيين هوما الوحيدين إلي خارجين عالقانون....بينما المجتمع فيه جرائم اخرين يعملوا فيها إلي ماهمش سلفيين...
على كل طلعوا وهبطوا السلفيين...إلى حد الان ما إعتداوش عل عبد بسكينة بنية القتل كيما عملوا شبيحة ستالين في تونس...وإلا نسيت سيادتك إلي دغروه في المهدية شعرة لا مات؟ ولا إلي ضربوه في وجهو في جندوبة بسكينة؟ وإلا إلي دغر طالب على خاطروا مختلف معاه؟
أنا هاني كذبتك كي قلت إلي الحكومة ماهاش تطبق في القانون معاهم...كان تنجم تكذبني إنتي زادة هات اعطني...بالمناسبة هي نفس الحكومة إلي تتهم فيها سيادتك بأنها مقصرة مع السلفيين...هي بيدها إلي ما قبضتش على عدنان الحاجي إلي دعا جهرةً لقتل ناس مختلفين معاه...ترة فهمني علاش عدنان الحاجي عديتوهالو سلامات؟ على خاطرو زعمة ماهوش سلفي؟ ماو قبل ما اطالب غيرك باش يكون نزيه ومحايد أعطي إنتي المثل...أما فاقد الشيء لا يعطيه....
حويجة باللهي عالطاير...ياخي في عهد الحكومة السابقة موش كانت ثمة أحداث كيما هكا...آش بيكم ما إتهمتوهاش بأنها تغطي عالسلفية؟ وإلا حمص وزبيب؟
هالنفاق متاعكم هو إلي يخلي واحد يتمنى انو هاك البنية إلي تخدمو فيها إن شاء الله اطيح على روسكم حجرة حجرة...برى قول متطرف...إرهابي...نهضاوي...سلفي...الشتيمة من المنافق هي كالوسام على الصدر
سيدي أولا هاشم موش هشام، ثانيا إنجم نأكدلك اللي موش الكلهم تشدو و أنا هذاكا شنوا طالب، إللي يعمل يخلص مني ولا موش مني، سلفي ولا غيرو و عطيت مثل متاع ناس حرقت مراكز و تشدت و ناس ما تشدتش، معلومة مؤكدة زادة اللي ما تشدوش، ما تحبش تصدقني إنت حر.
RépondreSupprimerو كان تعاود تقرى التدوينة مليح تلقاني ما طلبتش حاجة منافية للأخلاق الحميدة، طلبت كان تطبيق القانون على الجميع... و كانك عالبنية متاعنا ما تخافش عليها مازالت شادة روحها موش بش تطيح توا توا... اللهم كان تطلع دعوتك مستجابة.
و أخر حاجة، غالط فيا مانيش إعلامي، مجرد واب ماستر لا أكثر لا أقل